स्व. भास्कर रावजी शिंगणे विद्यालयाची निकालात ‘हॅट्ट्रिक’; तिन्ही शाखांचा निकाल १०० टक्के!
बुलढाणा( बुलढाणा माझा न्युज ):स्थानिक स्व. भास्कर रावजी शिंगणे उच्च माध्यमिक विद्यालयाने बारावीच्या निकालात पुन्हा एकदा आपले वर्चस्व सिद्ध केले आहे. विज्ञान, कला आणि वाणिज्य अशा तिन्ही शाखांमध्ये १००% निकालाची परंपरा कायम राखत विद्यालयाच्या शिरपेचात मानाचा तुरा रोवला आहे. गुणवत्तेच्या जोरावर विद्यार्थ्यांनी शाळेचे नाव जिल्हास्तरावर उज्वल केले आहे.संकेत जेउघाले प्रथमविज्ञान शाखेचा निकाल दरवर्षीप्रमाणे यंदाही उत्कृष्ट लागला आहे. संकेत संतोष जेउघाले याने ९०% गुण प्राप्त करून विद्यालयातून प्रथम येण्याचा मान मिळवला. त्यापाठोपाठ कु. स्नेहल देवकिसन जैन (८५%) हिने द्वितीय, तर प्रज्वल राजेंद्र खडके (८४%) याने तृतीय क्रमांक पटकावला. विशेष म्हणजे, विज्ञान शाखेतील ३० विद्यार्थ्यांनी ८०% पेक्षा जास्त गुण मिळवले असून एकूण ५४ विद्यार्थी प्राविण्य श्रेणीत उत्तीर्ण झाले आहेत.कला व वाणिज्य शाखेचीही दैदिप्यमान कामगिरीकला शाखेत कु. अर्चना बबन गुंजाळ ७२% गुण मिळवून प्रथम आली, तर कु. वैष्णवी भीमराव ढोरे हिने ७१% गुणांसह द्वितीय क्रमांक मिळवला. वाणिज्य शाखेत सूर्यकांत गजानन जाधव याने प्रथम क्रमांक पटकावत यशाची परंपरा कायम ठेवली. तिन्ही शाखांच्या १००% निकालामुळे पालकांमध्ये आनंदाचे वातावरण आहे.या यशाबद्दल संस्थेचे अध्यक्ष श्री. गणेशराव देशमुख यांनी सर्व यशस्वी विद्यार्थ्यांचे व त्यांच्या पालकांचे भ्रमणध्वनीद्वारे अभिनंदन केले. “विद्यार्थ्यांची मेहनत आणि शिक्षकांचे योग्य मार्गदर्शन यामुळेच हे यश शक्य झाले आहे,” अशा शब्दांत त्यांनी आपला आनंद व्यक्त केला. विद्यालयाचे प्राचार्य व सर्व प्राध्यापक वृंदानेही विद्यार्थ्यांचा सत्कार करून त्यांना पुढील उच्च शिक्षणासाठी शुभेच्छा दिल्या.
