चिखली तहसील अंतर्गत चांधई येथे ‘छत्रपती शिवाजी महाराज महाराजस्व समाधान शिबिर’ उत्साहात संपन्न,प्रशासकीय योजनांचा लाभ थेट जनतेच्या दारी; विविध विभागांमार्फत शेकडो लाभार्थी लाभान्वित

चिखली (एकनाथ माळेकर): महसूल विभागाच्या १८ फेब्रुवारी २०२६ च्या शासन निर्णयानुसार आणि जिल्हाधिकारी बुलढाणा यांच्या मार्गदर्शनाखाली, चिखली तहसील अंतर्गत चांधई महसूल मंडळाचे ‘छत्रपती शिवाजी महाराज महाराजस्व समाधान शिबिर (टप्पा क्र. १)’ शनिवारी, १४ मार्च २०२६ रोजी चांधई येथील मारोती मंदिर सभागृहात यशस्वीरीत्या पार पडले.
या शिबिराचे उद्घाटन मान्यवरांच्या हस्ते दीपप्रज्वलनाने करण्यात आले. यावेळी बुलढाण्याचे उपविभागीय अधिकारी श्री. शरद पाटील, निवडणूक उपजिल्हाधिकारी श्रीमती सुहासिनी गोणेवार, तहसीलदार श्री. विजय सवडे, गट विकास अधिकारी श्री. वाघ, आणि तालुका कृषी अधिकारी श्री. अशोक सुरडकर यांची प्रमुख उपस्थिती होती.
महसूल व इतर विभागांच्या कामांचा आढावा:
मंडळ अधिकारी श्री. संजय चौधरी यांनी प्रास्ताविकात मंडळातील कामकाजाचा अहवाल सादर केला. या मोहिमेअंतर्गत करण्यात आलेली प्रमुख कामे खालीलप्रमाणे आहेत:

• महसूल विभाग: ६० फेरफार निकाली काढले, १०३ सातबारा व १८४ ‘८-अ’चे वाटप. तसेच नैसर्गिक आपत्ती मदत वाटप पूर्ण.
• सेतू व संजय गांधी निराधार योजना: २७३ विद्यार्थ्यांना विविध दाखल्यांचे वाटप आणि ११ लाभार्थ्यांना नवीन मंजुरी आदेश प्रदान.
• आरोग्य विभाग: ११० नागरिकांची मोफत आरोग्य तपासणी आणि ५ आयुष्मान कार्डचे वाटप.
• कृषी विभाग: २८ लाभार्थ्यांच्या पीएम किसान व इतर अडचणींचे निवारण, तर ‘नानाजी देशमुख कृषी संजीवनी’ योजनेअंतर्गत ६ लाभार्थ्यांना प्रमाणपत्र वाटप.
• इतर: पुरवठा विभागातर्फे १० रेशन कार्ड दुरुस्ती, तर अंगणवाडी विभागामार्फत ३ पोषण किटचे वाटप करण्यात आले.
  मान्यवरांचे मार्गदर्शन:
  उपविभागीय अधिकारी श्री. शरद पाटील यांनी जमिनीच्या वारस नोंदी, तुकडेबंदी आणि अकृषक (NA) जमिनींच्या नवीन नियमांबाबत सविस्तर मार्गदर्शन केले. तहसीलदार श्री. विजय सवडे यांनी ‘AgriStack’ आणि अकृषिक परवानगीसाठी अर्ज करण्याची सुलभ पद्धत विषद केली. उपजिल्हाधिकारी श्रीमती सुहासिनी गोणेवार यांनी चालू असलेल्या मतदार यादी पुनर्निरीक्षण कार्यक्रमात नागरिकांनी सहभाग नोंदवण्याचे आवाहन केले.
  जनजागृती व सहभाग:
  शिबिरामध्ये सरस्वती नर्सिंग कॉलेजच्या विद्यार्थ्यांनी आरोग्याविषयी पथनाट्य सादर करून उपस्थितांचे लक्ष वेधून घेतले. भाजप युवा आघाडी अध्यक्ष श्री. संतोष काळे आणि युवा सेना अध्यक्ष श्री. नंदुभाऊ कऱ्हाडे यांनी स्थानिक प्रशासनाच्या कामाचे कौतुक करत जनसामान्यांचे प्रश्न मांडले.
  कार्यक्रमाचे सूत्रसंचालन ग्राम महसूल अधिकारी श्री. सुनील डव्हळे यांनी केले, तर आभार प्रदर्शन श्री. संजय डुकरे यांनी केले. या शिबिराच्या यशस्वितेसाठी चांधई मंडळातील सर्व ग्राम महसूल अधिकारी, कर्मचारी आणि ग्रामपंचायत प्रशासनाने विशेष परिश्रम घेतले.