डोणगाव पत्रकार संघाची नवी कार्यकारिणी जाहीर,सचिन गाभणे अध्यक्ष, ॲड. जैनुल आबेद्दीन शेख उपाध्यक्ष तर सुबोध आखाडे सचिवपदी निवड
डोणगाव :- डोणगाव पत्रकार संघाच्या नव्याने गठीत करण्यात आलेल्या कार्यकारिणीची अधिकृत घोषणा करण्यात आली असून, अध्यक्षपदी सचिन गाभणे, उपाध्यक्षपदी ॲड. जैनुल आबेद्दीन शेख आणि सचिवपदी सुबोध आखाडे यांची निवड करण्यात आली आहे. या निवडीमुळे डोणगावसह संपूर्ण परिसरातील पत्रकार बांधवांमध्ये आनंद व उत्साहाचे वातावरण निर्माण झाले आहे.
पत्रकार संघ ही केवळ एक संघटना नसून, समाजातील विविध प्रश्नांना वाचा फोडणारी, प्रशासन आणि जनतेमध्ये सेतू निर्माण करणारी एक महत्त्वाची चळवळ आहे. अशा या महत्त्वपूर्ण संघटनेची जबाबदारी अनुभवी, अभ्यासू व कार्यतत्पर नेतृत्वाकडे सोपविण्यात आल्याने संघ अधिक सक्षम, संघटित व प्रभावी पद्धतीने कार्य करेल, असा विश्वास पत्रकार व नागरिकांकडून व्यक्त केला जात आहे.
या कार्यकारिणीत व मार्गदर्शक मंडळात दिनोरे सर, अशोकवराव वानखेडे, सुरेशसिंह चव्हाण, सुनील पळसकर, जमील पठाण, जमीर शाह, यासीन बेग, राजेश वाघमारे, सुरेशभाऊ फिस्के, गजानन वाघमारे गणेश लहाने, आवेज पठाण तसेच विजय खरात यांचा समावेश आहे. सर्व सदस्यांचा पत्रकारितेतील प्रदीर्घ अनुभव संघाच्या कार्याला निश्चितच बळ देणारा ठरेल, अशी भावना व्यक्त होत आहे.
नव्या नेतृत्वाखाली पत्रकारांच्या हक्कांचे संरक्षण, त्यांच्या व्यावसायिक अडचणींचे निराकरण, पत्रकारांवरील अन्यायाविरोधात ठाम भूमिका, तसेच सामाजिक, शैक्षणिक व जनहिताच्या प्रश्नांवर सक्रिय सहभाग घेण्यात येईल, अशी अपेक्षा व्यक्त करण्यात येत आहे. तसेच नवोदित पत्रकारांना मार्गदर्शन, प्रशिक्षण व प्रोत्साहन देण्यावर विशेष भर दिला जाणार असल्याचेही संकेत मिळत आहेत.
डोणगाव परिसरातील विकासकामे, प्रशासनातील त्रुटी, सर्वसामान्यांचे प्रश्न, तसेच ग्रामीण भागातील वास्तव परिस्थिती निर्भयपणे मांडून सत्यनिष्ठ, जबाबदार व लोकाभिमुख पत्रकारिता अधिक प्रभावीपणे राबविण्याचा निर्धार नवनिर्वाचित कार्यकारिणीने व्यक्त केला आहे.
या निवडीबद्दल विविध स्तरांतून नवनिर्वाचित पदाधिकाऱ्यांवर अभिनंदनाचा वर्षाव होत असून, त्यांच्या पुढील वाटचालीसाठी शुभेच्छा दिल्या जात आहेत. नवीन जबाबदाऱ्यांसाठी अध्यक्ष सचिन गाभणे, उपाध्यक्ष ॲड. जैनुल आबेद्दीन शेख, सचिव सुबोध आखाडे तसेच सर्व कार्यकारिणी सदस्यांना मनःपूर्वक हार्दिक अभिनंदन करण्यात येत आहे.
डोणगाव पत्रकार संघाचे कार्य आगामी काळात प्रेरणादायी, प्रभावी व समाजहितकारी ठरो, पत्रकारितेची विश्वासार्हता अधिक दृढ व्हावी आणि सत्य, निर्भयता व जनहिताचे मूल्य अधिक उंचीवर जावे, हीच सर्वांची अपेक्षा व सदिच्छा आहे.
